COEPAST BLOG, Jumat, 21 Januari 2011
Badusta Sakampungan
Kisah ne ulun dapat wadah kakawanan jua, lucukah kadakah nah, nang panting dikisahakan dulu yakalo. Hahahaha...
Jar kakawanan judulnya badusta sakampungan.
kaini nah kisahnya,
ada jar badua baranak, nang abah lawan nang anak tulak malunta ka sungai di hilir. nang anak itu anggaplah ngarannya si anang bungas. Tulakanai neh badua baranak tu tadi. Tulak bajalan haja.
Imbah sampai disungai nang sudah dirancanaakan, laluai nang abah manyiapakan luntanya. Imbah itu maancang-ancang handak manimbai luntanya ka sungai. Si anang bungas dihiga haja mahadang. Imbah itu ditimbaiai oleh nang abah.
Nah, pas ditimbai tadi pas imbah waktunya ditarik, laluai ditarik oleh nang abah. Ih sakalinya karas, takait sakalinya luntanya. Takait napakah kada tahu jua.
Laluai nang abah manyuruh si anang bungas mamariksa takait napa luntanya.
'nang, tajuniakanpang tuh luntanya, pariksai pinanya takaitnah', ujar nang abah.
'inggih, ayuja bahai, ulun tajuniakan.' ujar anang bungas manyahut.
Lalu Mambuka,ai si anang bungas tadi ka baju hndak batajun. Tapi salawar pinanya kada pang, ngalih kaina kalu kalihatan urang lumbuk parawitnya jar anang bungas, hahahaha.
Rupanya si anang bungas ne tadi ada mambawa wadai untuk sabuting mulai rumah. Bingung handak meandak dimana, padahal handak batajun neh, laluai dibuatnya wadai tadi kadalam muntung. Rupanya halus haja kalu wadainya jadi muat haja.
Sudahai, lalu batajunai si anang bungas nih.
Cabaawww...
Inya banyalam kadalam sungai handak mamariksa takait napa luntanya. Rupanya dalam banar kalu sungainya, kada tahan lagi, lalu bacungul ja timbul si anang bungas nih.
Bingungai nang abah nih, laluai batakun sidin, "Napa nang, masih takaitnah luntanya."
Sasuai judulnya laluai anang bungas nih baucap sambil mangaluarakan wadai untuk tadi.
"Itu bahai, tadi sakalinya di dalam sungai ulun ada malihat warung, singgahai ulun, nah nang ulun tukar," ujar si anang bungas sambil manunjukkakan wadai untuk nang tadi.
Bingung sidin, rasa kada parcaya. lalu batajun ja ka dalam sungai tadi, handak mamastiakan bujur juakah ada warung di sungai tu.
Cabaawww..
Batajunai nang abah. eh sakalinya pas batajun ka dalam sungai, sakalinya ada tunggul di dalamnya. Harau Tahangkup dahi sidin. Badarahan...
Lalu bacungulai sidin, pina kapadihan ha, maras banar...
malihat nang abah pina mumui darah di dahi, takajutai si anang bungas.
"Kanapa pian bah, jadi dahi pina mumui lawan darah." jar anang bungas.
Laluai nang abah manyahuti kada handak kalah., "gara-gara ikampang nangai tadi nukar untuk di warung kada bayar jadi aku dipukuli urang."
Maaflah mun kada lucu kisahnya, hehe...
Wassalam
Postingan nang pamulaan nah...
Assalamualaikum Wr. Wb.
Alhamdulillah, akhirnya tacipta jua blog ulun ngini. Blog nang mamakai bahasa banjar haja. Gara gara blog nang bahasa indonisia kada tapi taurus lagi, laluai ulun bingung. Pusing tujuh kaliling handak maupdate blog nang ituh. Harau gara2 mamikirakan blog nang ituh, kada tapikirakan lagi urusan nang lain. Aur nang itu ha nang diganang, muyak jua. Akayah. Lawan samalam ulun ada malihat berita di tivi, nang tukang baca pakai bahasa banjar, kacar jua ulun. Apalagi ulun lihat wayahini kakanakan pina mamakai bahasa banjar bacampur bahasa Indonesia, Jadinya ulun ulahai blog ini. Malaranai, mudahan ada jua manfaatnya yakalo. Amien...
Ulun mangucapakan salamat datang sagan dingsanak-dingsanak sabarataan lawan kakawanan nang ada di dumay alias dunia maya, baik lalaki ataupun bibini, kakanak atawa tuha, kada jadi masalah, wkwkwkwk...
Sagan nang ada di luar kalimantan, atawa nang lagi di luar nagri, baik nang sakulah, kuliah, ataupun bagawi, blog ini kawa ja dipakai sagan sarana bapandiran, nyaman kada tapi hilang bahasa banjarnya, tamasuk jua logatnya. Mun hilang ngaliham kaina. Pas bulik Sangka urang kaina lain urang banjar, napang bapandir pina kada kaya urang, Hahahaha...
Tarakhir, ulun mangucapakan muhun maaf nang saganal-ganalnya, mun bahasa banjar ulun kaya ini. Inipang sudah bahasa banjar nang ulun bisa.
Wassalam
Langganan:
Postingan (Atom)